ARMANIACUS Tractus

ARMANIACUS Tractus

vulgo l'Armagnac, Comitatus Galliae, Vasconiae pars, inter Occitaniam, tesqua Burdigalensia, Aginensem et bigerrensem regionem. Caesar huius incolas Americos vocat, Comm. l. 7. Habuit olim Comites inclitos, postmodum Navarrae regno, cum Bearnensi et Fuxensi regione hic Comitatus unitus est. Hinc Cardinalis Armaniacus, Georgius, dictus, qui a Francisco I. in Italiam missus, dein Possiaceno colloquio interfuit, tandemque Archiepiscop. Tholosanus et Avenionensis factus est. Avunculus Henrici IV. Obiit A. C. 1585. Sanderus, in Elog. Hinc etiam Armaniaci Galli dicti, qui Duce Ludovicô Delphinô, postmodum huius nominis XI. Galliae Rege in Helvetiam irruperunt A. C. 1444. an ut Tigurum ab Helvetiis obsessum liberarent, an ut Concilium Basiliense dissiparent, illud in gratiam Friderici III. imperator. et Alberti Austriaci, istud in gratiam Eugenii IV. Tum commissa celebris illa pugna Saniacobaea, prope Basileam, in qua ex parte Gallorum, quorum triginta milia erant, sex milia, ex parte vero Helvetiorum, quorum erant mille sexcenti, omnes, exceptis sedecim, occisi sunt. Tum et Burcardus Monachus, qui Armaniacos eciverat, ab iis Borgue le Moyne dictus, cum post cruentum proelium, inter caesa cadavera, apertâ galeâ obequitans, caesis illuderet, a semianime Helvetio, qui in genua se erexerat, lapide in faciem contortô, tantâ vi percussus est, ut subito ex equo prolapsus, postridie exspiraret. Commissa pugna est die 26. Augusti anni praedicti. Vide Stumpfium l. 12. c. 15. Hist. Helv. Urstis. Hist. Basil.